ໃນວັນທີ 29 ກຸມພາ 2016 ທີ່ຮ້ານອາຫານຄົວລາວ, ສະມາຄົມນັກທຸລະກິດແມ່ຍິງລາວ (ສທຍລ) ໄດ້ຈັດງານສະຫລຸບການຈັດຕັ້ງປະຕິບັດງານເທດສະການອາຫານລາວ ຄັ້ງທີ່ 11 ທີ່ມີຂຶ້ນໃນລະຫວ່າງ ວັນທີ 30 ມັງກອນ 2016 ທີ່ຜ່ານມາ, ໂດຍການເຂົ້າຮ່ວມຂອງທ່ານ ດຣ. ອິນລາວັນ ແກ້ວບຸນພັນ ປະທານສູນກາງສະຫະ ພັນແມ່ຍິງລາວ, ທ່ານ ນາງ ຈັນເທົາ ປະຖັມມະວົງ ປະທານກິດຕິມະສັກ ສະມາຄົມນັກທຸລະກິດແມ່ຍິງລາວ, ທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງລາວ ພ້ອມດ້ວຍບັນດາສະມາຊິກເກົ່າ ແລະ ສະມາຊິກໃໝ່ເຂົ້າຮ່ວມ.

ທ່ານ ນາງ ຈັນທະຈອນ ວົງໄຊ ກ່າວ່າ: ເທດສະການອາຫານລາວ ປີ 2016 ທີ່ໄດ້ຈັດຂຶ້ນໃນລະຫວ່າງວັນທີ 2830 ມັງກອນ 2016 ຜ່ານມານັ້ນ ມີທັງໝົດ 160 ຫ້ອງຂາຍ, ຖ້າທຽບໃສ່ ຄັ້ງທີ 10 ປີ 2015 ແມ່ນໄດ້ເພີ່ມຂຶ້ນ 40 ຫ້ອງ, ໃນນັ້ນ ຫ້ອງວາງສະແດງ ແລະ ຂາຍຜະລິດຕະພັນ ຈໍານວນ 154 ຫ້ອງ ມາຈາກຕ່າງແຂວງ 51 ຫ້ອງ ຊຶ່ງກວມເອົາອັດຕາສ່ວນ 33%, ມາຈາທ້ອງຖິ່ນຕ່າງໆ ໃນນະຄອນຫລວງວຽງຈັນ 84 ຫ້ອງ ເທົ່າກັບ 54%, ຈາກສະຖານທູດປະເທດອາຊຽນ 4 ຫ້ອງ ແລະ ບັນດາຜູ້ປະກອບການແມ່ຍິງອາຊຽນທີ່ໃກ້ຄຽງ (OTOPຈັງຫວັດອຸດອນທານີ ປະເທດໄທ) 15 ຫ້ອງ.

ເທດສະການອາຫານລາວ ຄັ້ງທີ 11 ນີ້ແມ່ນໄດ້ຮັບຄວາມນິຍົມຈາກມວນຊົນຢ່າງກວ້າງຂວາງ ສະແດງອອກໃນມູນຄ່າສິນຄ້າ ທີ່ຜູ້ປະກອບການນໍາມາຂາຍຢູ່ໃນງານ ປະມານ 2.419 ລ້ານກີບ (2 ຕື້ກວ່າກີບ). ໃນໂອກາດດຽວກັນນີ້ ສະມາຄົມນັກທຸລະກິດແມ່ຍິງລາວ ຍັງໄດ້ມີພິທີຮັບເອົານັກທຸລະກິດແມ່ຍິງ ເຂົ້າເປັນສະມາຊິກຂອງສະມາຄົມຈໍານວນ 14 ທ່ານ.

ໃນພິທີ, ທ່ານ ດຣ. ອິນລາວັນ ແກ້ວບຸນພັນ ກໍ່ໄດ້ກ່າວຍ້ອງຍໍຊົມເຊີຍ ສະມາຄົມນັກທຸລະກິດແມ່ຍິງລາວ ທີ່ໄດ້ເຄື່ອນໄຫວເຕົ້າໂຮມຄວາມສາມັກຄີບັນດາເອື້ອຍນ້ອງແມ່ຍິງລາວ ເພື່ອເປັນການຍົກຖານະບົດບາດຂອງແມ່ຍິງລາວໃຫ້ສູງຂຶ້ນ ໃນເວທີພາຍໃນ ແລະ ສາກົນ, ສທຍລ ໄດ້ຮັບການສ້າງຕັ້ງຂຶ້ນຈຸດປະສົງຫລັກກໍ່ເພື່ອ ເຕົ້າໂຮມຄວາມສາມັກຄີເອື້ອຍນ້ອງແມ່ຍິງ ພ້ອມທັງຊຸກຍູ້ສົ່ງເສີມພັດທະນາແມ່ຍິງລາວ ໃນການດໍາເນີນທຸລະກິດໃຫ້ກ້າວໄປຂ້າງໜ້າ ແລະ ບັນດານັກທຸລະກິດແມ່ຍິງທີ່ເປັນສະມາຊິກກໍ່ຕ້ອງຜັນຕົວເພື່ອເຂົ້າມາໃນວຽກງານຊ່ວຍເຫລືອສັງຄົມນໍາອີກ.

ຄັດຈາກ: ໜັງສືພິມ ເສດຖະກິດການຄ້າ ສະບັບວັນທີ 1/3/2016