ຜົນການເຂົ້າຮ່ວມກອງປະຊຸມເຄືອຂ່າຍຜູ້ປະກອບການແມ່ຍິງອາຊຽນ ຄັ້ງທີ 2 (The 2nd ASEAN Women Entrepreneurs Network Forum 2016: AWEN) ຈັດຂຶ້ນລະຫວ່າງວັນທີ 45 ມີນາ 2016 ທີ່ນະຄອນຫລວງຮ່າໂນ້ຍ, ສສ ຫວຽດນາມ ໂດຍການເປັນປະທານຂອງທ່ານ Nguyen Thi Doan ຮອງປະທານປະເທດ ແຫ່ງ ສສ ຫວຽດນາມ, ທ່ານ ນາງ Pham Thi Hai Chuyen ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ທ່ານ Vu Tien Loc ປະທານສະພາການຄ້າ ແລະ ອຸດສາຫະກໍາອາຊຽນ ແລະ ທ່ານ Le Luong Minh ເລຂາທິການໃຫຍ່ອາຊຽນ ພ້ອມດ້ວຍບັນດາຜູ້ແທນ ແລະ ແຂກຮັບເຊີນປະມານ 500 ກວ່າຄົນ ຈາກຫົວໜ່ວຍທຸລະກິດຂະໜາດນ້ອຍ ແລະ ກາງ (SMEs) ຈາກ 10 ປະເທດອາຊຽນເຂົ້າຮ່ວມ.

ຈຸດປະສົງໂດຍລວມຂອງກອງປະຊຸມໃນຄັ້ງນີ້ຄື: ເພື່ອສົ່ງເສີມການຮ່ວມມື, ແລກປ່ຽນບົດຮຽນ ແລະ ຍົກລະດັບການພັດທະນາເຄືອຂ່າຍຜູ້ປະກອບການແມ່ຍິງອາຊຽນ, ສົ່ງເສີມການຄ້າການລົງທຶນລະຫວ່າງຜູ້ປະກອບການແມ່ຍິງໃນຂົງເຂດອາຊຽນ ແລະ ຂອບການຮ່ວມມືອາຊຽນ ໂດຍມີການນໍາສະເໜີຜົນການດໍາເນີນງານທີ່ກ່ຽວຂ້ອງກັບຫົວຂໍ້ Fostering Women Entrepreneurs in Advancing the ASEAN Economic Community: AEC Development, ໃນກອງປະຊຸມຄັ້ງນີ້ຍັງມີການມອບລາງວັນໃຫ້ແກ່ຜູ້ປະກອບການແມ່ຍິງດີເດັ່ນຈໍານວນ 67 ຄົນຈາກປະເທດສະມາຊິກອາຊຽນ. ໃນນັ້ນ ມີຜູ້ປະກອບການແມ່ຍິງຈາກ ສປປ ລາວ ໄດ້ຮັບລາງວັນເຖິງ 8 ທ່ານ ດັ່ງນີ້:

  1. ທ່ານ ນາງ ຈັນທະຈອນ ວົງໄຊ, ປະທານສະມາຄົມນັກທຸລະກິດແມ່ຍິງລາວ, ຮອງປະທານກຸ່ມບໍລິສັດ K&C ຈໍາກັດ, ທຸລະກິດທົ່ວໄປ
  2. ທ່ານ ນາງ ມະໂນລາ ດາລາວົງ, ຮອງປະທານ ສະມາຄົມນັກທຸລະກິດແມ່ຍິງລາວ, ເຈົ້າຂອງຮ້ານອາຫານຄົວລາວ, ທຸລະກິດອາຫານ ແລະ ເຄື່ອງດື່ມ
  3. ທ່ານ ນາງ ວຽງສຸດອຸລາ ເພັດສັງຫານ, ຄະນະບໍລິຫານ ສະມາຄົມນັກທຸລະກິດແມ່ຍິງລາວ, ເຈົ້າຂອງຮ້ານຫັດຖະກໍາອໍາມະລິນໄໝລາວ
  4. ທ່ານ ນາງ ວິດາລີ ຈັນທະຜາສຸກ, ຄະນະບໍລິຫານ ສະມາຄົມນັກທຸລະກິດແມ່ຍິງລາວ, ເຈົ້າຂອງ ແລະ ຮອງອໍານວຍການບໍລິສັດ SC ອອກແບບ ແລະ ກໍ່ສ້າງ
  5. ທ່ານ ນາງ ລັດສະໝີ ເວດສະພົງ, ຄະນະບໍລິຫານ ສະມາຄົມນັກທຸລະກິດແມ່ຍິງລາວ, ເຈົ້າຂອງ ແລະ ອໍານວຍການ ຮ້ານອາຫານແຊບອີ່ຫລີ
  6. ທ່ານ ນາງ ບຸນທະວີ ຈຸນລະມະນີ, ສະມາຊິກ ສະມາຄົມນັກທຸລະກິດແມ່ຍິງລາວ, ອໍານວຍການໂຮງງານຜະລິດເກືອເວີນຄໍາ
  7. ທ່ານ ນາງ ເກດສະຫວັນ ປັນຍາທິບ, ສະມາຊິກ ສະມາຄົມນັກທຸລະກິດແມ່ຍິງລາວ, ເຈົ້າຂອງ ແລະ ອໍານວຍການ ວາລະສານ TARGET
  8. ທ່ານ ນາງ ອາລັງ ວັງທະຈັນ, ປະທານຄະນະຂົນຂວາຍສ້າງຕັ້ງສະມາຄົມນັກທຸລະກິດແມ່ຍິງແຂວງຫລວງນໍ້າທາ, ອໍານວຍການບໍລິສັດຮຸ່ງອາລຸນຂາເຂົ້າຂາອອກ ແລະ ຂົນສົ່ງ.

ນັກທຸລະກິດແມ່ຍິງທັງ 8 ທ່ານ ທີ່ໄດ້ຮັບລາງວັນນັ້ນ ເປັນຜູ້ປະກອບການດີເດັ່ນຈາກພາກທຸລະກິດທີ່ຫລາກຫລາຍສາຂາ ຊຶ່ງເປັນທີ່ຍອມຮັບວ່າ ເປັນຜູ້ທີ່ມີຄວາມໂດດເດັ່ນ, ອຸທິດຕົນ ແລະ ມີຜົນງານສໍາຄັນໃນການສ້າງຄວາມກ້າວໜ້າຂອງຜູ້ປະກອບການແມ່ຍິງ ແລະ ສະແດງເຖິງພະລັງຄວາມສາມາດຂອງແມ່ຍິງໃນການປະກອບສ່ວນພັດທະນາເສດຖະກິດໃນ ສປປ ລາວ.

 

ຄັດຈາກ: ໜັງສືພິມ ເສດຖະກິດການຄ້າ ສະບັບວັນທີ 15/3/2016